Alen da Onda's Podcast

Alen da Onda Especial Courel

Alen da Onda — Tue, 21 Aug 2012 19:28:25 +0000

Co gallo da II Festa Revolta para reivindicar o Parque Natural do Caurel, o equipo de Alen da Onda desprazouse até a aldea de Froxán para realizar un programa especial sobre a realidade misteriosa da serra máis extraordinaria da Galiza, todo un tesouro no que respeita a mitos, lendas e fenómenos paranormais. Desde a situación do Monte Medulio, a historia da invasión romana ou os mitos máis arraigados da contorna até a presenza de seres alieníxenas e a desaparición de vellos códices, o misterio e o humor alíanse nesta edición especial do programa máis paranormal da FM galaica para reivindicar un espazo único da nosa xeografía. Os nosos expertos científicos do paranormal, Casimiro Canalillo, Ezequial Daniel, Garma Alba e Nero Relicario analizan a carón de Orlando Álvarez, de SOS Caurel, a enteira dimensión mítica da serra ameazada pola comenencia económica e a indolencia política.

Alen da Onda 15

Alen da Onda — Thu, 31 May 2012 09:45:02 +0000

Recuperamos o arquivo secreto de Alen da Onda sobre o ocultismo, perdido durantes semanas por escuros avatares conspirativos. O programa que provocou a caída de Conde Roa agora á vosa disposición, no que os nosos expertos científicos do paranormal analizan os crípticos designios de sociedades secretas e lobbies de presión a través da manipulación de saberes demoníacos e índices bursátiles inefabeis. Cunha entrevista senlleira ao alcalde de Santiago, membro durante anos dunha célebre sociedade secreta, e a un Vidente do Ministerio de facenda que descubriu as evidencias que precipitaron a caída do rexedor compostelán.

Alen da Onda 17

Alen da Onda — Mon, 21 May 2012 09:53:29 +0000

Na decimoséptima edición de Alén da Onda os nosos expertos científicos do paranormal abordan a controvertida epidemia zombi que semella abanar a sociedade occidental. A vaga de zombis ateiga universidades, centros comerciais, fábricas de xoguetes e parlamentos políticos sen que ninguén poda ofrecer unha explicación convincente da orixe do fenómeno. Entre tanto a crise económica e os escándalos financeiros que conmoven o hemisferio norte parece íntimamente ligada coa aparición dos mortos viventes e os seus devaneos políticos con todo tipo de extremismos.

Alen da Onda 16

Alen da Onda — Mon, 21 May 2012 10:25:00 +0000

Os últimos acontecementos no seo da Casa Real desatan a polémica nos fiadeiros parapsicolóxicos europeos. Cazerías de elefantes, accidentes nas escaleiras, tiros no pé, escándalos de corrupción, a monarquía borbónica semella atravesar o seu particular Annus Horribilis. Algúns atrévense a agoirar a chegada da Terceira República, outros conténtanse con comentar a prolífica vida sexual do monarca e aínda algúns pregúntanse con toda a oportunidade polas ligazóns secretas entre a Raíña Sofía e o Club Bilderberg, seita reptiliana que parece mover os fíos das altas finanzas e a alta política internacionais. Esta e outras cuestións son abordadas polos nosos expertos científicos do paranormalna decimosexta edición de Alén da Onda.

Alen da Onda 14

Alen da Onda — Sun, 20 May 2012 17:40:09 +0000

Nunha nova edición de Alen da Onda, os nosos expertos científicos do paranormal abordan o controvertido fenómeno do Amor e as súas consecuencias parapsicolóxicas sobre individuos e colectividades históricas. A loita entre Eros e Tanatos revélase como variante prehistórica da guerra química entre superpotencias que esmagan por completo a vaidade humana.